Filarmoniche di Colorêt: ce premi
"Flicorno d'oro" di Rive Dal Garde
Il Diari - mercoledì 23 Aprile 2008
Afermazion de Filarmoniche di Colorêt di Prât che al 10m Concors bandistic internazionâl "Flicorno d'oro" di Riva del Garda, dai 30 di Març, e à vinçût il secont premi de tierce categorie. Cun di plui il premi speciâl pal miôr mestri propite al lôr Fulvio Dose. A jerin dôs juriis internazionâls cun da cjâf il preseât mestri de Belgjiche André Waignein a judicâlis 23 bandis che a vignivin di dute Europe. Ancje se Colorêt di Prât al è un piçul paîs de provincie di Udin, in comun di Pasian di Prât, cun sù par jù mîl abitants al à il svant di tignî di cont la anime popolâr, ancje cu la Filarmoniche che e à plui di cent agns di storie (dal 1893) e e à scomençât a fâsi cognossi tal 1926 rivant prime tal Concors pes bandis di Udin. Grande fieste tra i sunadôrs e grande sodisfazion. Luzie, clarin, e conte che al concors la tension si è smolade nome daspò vê sunât, tal moment di sintî la alte votazion cul non de nestre Filarmoniche e che no dismentearà lis sensazions e la gjonde tal viodi il mestri premiât tant che miôr mestri. Il president de Filarmoniche Marcello Di Benedetto al conte: "Dal sigûr no podevin jentrâ in competizion cui svuizars e cun chei altris professioniscj, ducj sunadôrs diplomâts in Conservatori. La nestre bande e je rapresentative di un paîs. Nô o fasin sfiladis e processions; o vin di dut, dal frut che al scomence a sunâ, al anzianut che al piert la rie parcè che al è cence ocjâi, al operari che al mole di vore une ore prin di provis. Il nestri segret al è tal rivâ a fâ, di ducj chei sunadôrs, un cuarp unic, une comunitât".
Enrico Geatti, clarinet bas, al dîs che il fat di tirâ dongje e di fâ compagnie al è stât ancje merit di ideis pôc musicâls come il "purcit de bande" (cjolt purcitât dai sunadôrs intune sabide di fraie di fevrâr e vendût a pro de bande), i campionâts di balon e lis gjitis (tal 2005 a son rivâts fintremai in Svezie) e ancje, parcè di no, tal sît internet. La segretarie Cristina De Cillia, oboe, e dîs graciis a ducj pes emozions cussì bielis, pal divertiment e pe voie di fâ ben che ducj i sunadôrs a àn vût dilunc dut il concors, tant che e mostre il cont di dutis lis ativitâts di vie pal an: uns 30 jessudis, une desene di conciertse la partecipazion, tant che bande a disposizion, pai mestris des corâls par diretôrs. In dì di vuê la etât dai sunadôrs e va dai 14 ai 73 agns e i socis a son sù par jù une setantine.. "Il sucès de Filarmoniche - al dîs ancjemò il president Di Benedetto - al ven dal biel lavôr dal so diretôr che al à preparât cussì ben il grup. E il so premi, che al ven dât nome se la jurie e cjate la unanimitât, al à grande rilevance. Il mestri Fulvio Dose, nassût a Gurize tal '68, al è diplomât in clarinet li dal conservatori di Triest e al à studiât ancje armonie e strumentazion par bande. Dal 1992 cu la Filarmoniche di Colorêt, dal 1997 al dirêç ancje la Orchestre Civiche di Flâts "Giuseppe Verdi" di Triest. Il premi che o vin meretât – al zonte il president - al va ancje al lavôr dal consei, a ducj i sunadôrs, cence dismenteâ la scuele de bande (il cors par fruts e zovins, cun sessante arlêfs, al insegne ducj i struments par bande cun di plui ghitare e pianoforte) e a chê par cont de associazion des bandis (ANBIMA) tignude dai mestris Daniele Carnevali e Marco Somadossi e a dute la comunitât di Colorêt di Prât."
STEFANO GASTI
Segreterie 334 1339617
www.filarmonicacolloredo.it